فتنة...طائفية..أهلية..(مبادرة بيت الدين)

بما ان احنا عندنا المشكلة الاساسية هي ان احنا معندناش ثقة في الآخر مهما كان هو ايه ودي الحمد لله من بركات نظام مبارك اللي خللى الواحد معندوش ثقة يمكن حتى في اقرب الناس ليه...


فبقينا كل لما واحدة تسلم وتقوم طالعة اشاعة ان الكنيسة خطفتها عشان ترجعها تاني للمسيحية...فيقوم حبايبنا الحلوين السلفيين عاملين مظاهرة عايزين اختنا كاميليا..فتقوم اختنا كاميليا تطلع على الفضائيات وتدي للمصريين اكبر خاذوق يطلع من راسهم ان هي عمرها ما اسلمت وان هي تفضل ان هي تموت مسيحية ومتسلمش...


فييجي الناس اللطيفة اللي هما ميكس من اسرائيل على حبة بلطجية بشوية دعم من الفلول على حبة جهل ديني مستغلين موضوع السلفيين وكاميليا ويروحوا امبابة يهجموا على كنيسة ويحرقوا واحدة تانية عشان خاطر عيون طنط عبير....


وتبتدي من هنا الفتنة الطائفية اللي ممكن لو اتسابت كده طليقة...تؤدي الى حرب اهلية...يعني احنا بقى المشكلة مش في السلفيين ولا في الأقباط المشكلة ان اللي بيروح يغير دينه ده..حيبقى غير آمن مش على نفسه ده مش آمن على مصر بالطريقة دي...مهو متقنعنيش ان السلفيين لو حد من عندهم قرر يتنصر حيسيبوه في حاله ومش حيقيموا عليه الحد...


عشان كده جاتلي فكرة بيت الدين وهي بتعتمد ان اي انسان لما بييجي يغير دينه..بيبتدي رجل دين من ديانته ينصحو ويشوف هو عايز يحول دينه ليه ويمكن يقنعه انه ميغيرش دينه

فالمبادرة كالآتي:

- نبني تلات مباني في وسط القاهرة لو قدرنا الاول جامع، والتاني كنيسة، والتالت بيت الدين
- بيت الدين ده هو المكان اللي يبقى فيه ممثلين عن كل الاديان المعتنقة في مصر بكل طوائفها
- اللي يحب يغير ديانته يروح لبيت الدين ويطلب تحويل ديانته من كذا لكذا فيقوم ممثلي الديانة اللي هو حيتحولها تبعته لممثلي ديانته الاصلية ويقوموا بنصحه وارشاده ولو اقتنع كان بها..مقتنعش هو حُر...ويبقى كده اللي عايز يحول ديانته راح لجهة واحدة هي الجهة الوحيدة المسئولة عنه
- بيت الدين هيبقى كمان مسئول عن توحيد الخطاب الديني لكل ديانة بمختلف طوائفها في الحاجات اللي تقدر الطوائف دي التوحد فيها
- بيت الدين كمان هيبقى هو المسئول عن وضع المناهج الدينية الدراسية اللي احنا اصلا محتاجين نغيرها عشان ندعو ابنائنا لتعلم روح الدين وازاي الدين ده اسلوب للتفكر مش بس قواعد نمشي عليها
- بيت الدين هيبقى منفصل تماماً عن اي مؤسسة في الدولة سواء سياسية او دينية وغير مُسيطَر عليه من اي جهة
- بيت الدين هيبقى عبارة عن مجلس زي مجلس الشعب حيمثل كل طائفة دينية اتنين من رجالها وتتم رئاسة هذا المجلس بالتناوب بين الاديان ككل وليست الطوائف ولتكن البداية بالدين المسيحي مثلا
- فترة رئاسة المجلس هي 3 سنوات
- مع الأخذ في الاعتبار ان منصب رئيس المجلس هو منصب تنظيمي ليس اكثر وليس له تأثير في قرارات المجلس 
- لا يجوز لرئيس أي مؤسسة دينية أخرى أن يشترك في بيت الدين لأن المؤسسات الموجودة حاليا هي مؤسسات مُسَيسة بطبيعتها فمثلاً
- لا يجوز لشيخ الأزهر وكذلك بابا الأسكندرية أن يشتركوا في بيت الدين ولكن يوجد لهذه المؤسسات ممثلين عنها
- يتم اختيار ممثلي الطوائف بالانتخاب بين رجال دين تلك الطوائف بمختلف اديانها..مفيش حاجة اسمها تعيين او تزكية


هو طبعاً من الواضح ان المبادرة لسه مخلصتش وفيها حاجات ناقصة كتير بس بصراحة انا كنت عايز انشر المبادرة دي في اسرع وقت بس انا لسه مخلصتش..لسه هبحث عن شوية حاجات كده بفكر فيها وهكمل المبادرة ان شاء الله....اشوفكو التدوينة الجاية

فتنة...طائفية..أهلية..(1)

زي ما قال عمنا جلال عامر فرس النبي مش لازم يبقى مؤمن وعباد الشمس مش شرط يكون كافر...احنا ليه دايماً بقى حاطين في دماغنا ان الكون ده كل الخلق اللي فيه كده ببساطة كافرين ومؤمنين؟؟؟ يعني مثلا المسلم يقولك على اللي مش مسلم كافر واللي مش مسلم يقولك عالمسلم كافر مع ان في الاخر لا ده كافر ولا ده كافر...هو أصلاً يعني ايه كافر؟؟؟

الكُفر: هو الجحود، كما ورد في المعجم الوجيز، اذاً الكافر هو الجاحد...قلك لأ الكافر: هو غير المؤمن بالله، كما ورد في المعجم الوجيز، قلتله ماشي يا عم خلاص يبقى الكافر هو الجاحد بالله لأن الجحود هو انكار الشئ مع العلم بوجوده، وده تبعاً لصاحبنا الوجيز...واتفقنا
قلتلوا تعالى بقى نفكر بطريقة تانية...لو مشينا لغوياً مش حنلاقى في حاجة اسمها كُفر بالطريقة اللي احنا فاهمينو بيها لأن لو بصينا للمعنى اساساً حنلاقي ان الكافر هو كمان مؤمن بوجود برب بس هو مجرد حالة انكار لوجوده...فما بالك بقى باللي بيقولك انا بأعبد نفس ربك ومؤمن بنبيك ومعترف بيك وبحترمك وبحترم دينك؟!!! لأ وكمان ايه انت اصلاً دينك معترف بيه ديناً ونبياً وكتاباً...يا لهوي اولع في نفسي؟؟؟

أما بقى دينياً
لما ربنا خلق آدم..ربنا عَرَف آدم ان في إله هو اللي بيخلق وهو اللي بيرزق وهو اللي بيعلم..وبعدين آدم نزل الارض وعلم أولاده ان في إله هو اللي بيخلق وبيرزق وبيعلم وولاده علمو ولادهم وولادهم علمو ولادهم ومن هنا جت الفطرة...
لغاية لما وصلنا للجيل البشري اللي عايش ده وفجأه اكتشفنا ان احنا لسه متعلمناش اهم درس هو ان ربنا لو مكنش عايز آدم ينزل من الجنة مكنش حينزلوا...أنا بقى في رأيي ان نزول آدم من الجنة هو السبب الرئيسي اللي خللى ربنا يعدد الأديان...عشان يخلي البشر على الرغم من اتفاقهم على البداية وهم عارفين انهم كلهم متفقين على نفس البداية دا كمان النهاية متفقين عليها، بس هما مختلفين في اللي ما بين البداية والنهاية وده اساساً في حياة الانسان لوحده هو عارف ان هو بدايته مولود ونهايته ميت بس محدش يعرف اللي في النص


وبعدين ماهو مفيش حد بيتحاسب عن حد عشان كده احنا لازم نتعلم ان الدين ده بتاع كل انسان لوحده هو اللي مسئول عنه وهو اللي حيتحاسب عليه واللي عايز يدخل في الاسلام او في المسيحية او في اليهودية او حتى البوذية ما يتأخرش لأن مفيش ديانة حتزيد ولا حتنقص بالحد ده...عشان كده انا عندي مبادرة لحل المشكلة دي في مصر بالذات بس مش حقولها هنا..حقولها في تدوينة تانية

البالونة...والسمكري

كل شوية اليومين دول نلاقي خبر مستفز بينزل علينا...ابتداء من ان المصريين في الخارج مش هيصوتوا في الانتخابات اللي جاية وبعدين الاتجاه لتأجيل الانتخابات وبعدها بشوية المجلس يقولك لا صحة لما تردد في وسائل الاعلام والصحف عن منع المجلس الاعلى للقوات المسلحة المصريين في الخارج من التصويت في الانتخابات المقبلة ولا صحة في الاتجاه لتأجيل الانتخابات..ده طبعا غير المجالس المحلية اللي كل يوم بيسربوا أخبار عن حلها وطول ما الناس ساكتة..المجلس مطنش..وقيس على كده بقى اخبار جس النبض زي مثلا:
اعتذار المخلوع للشعب..اقطع دراعي اذا ما كان المجلس السمكري هو اللي مسرب الخبر ده، وهو كمان اللي كان مسرب التسجيل بتاع حسني على قناة العربية..
وبعدين يسربلك اخبار عن ان
السعودية والامارات بيمارسوا ضغوط عشان مبارك ميتحكمش وبعدين ينفوا الكلام ده..وهكذا بقى في كل حاجة.
وآخر حاجة بقى قللك عليها السمكري هي الانهيار الاقتصادي في البلد..والبلد بتغرق والحقونا يا خلق..وعايزين فلوس..ومجاعة..لغاية لما بيتونا ليلة سودا وبعدين يقول لك بس الوضع الاقتصادي ده كنا لازم حنوصله حتى لو مكنش في ثورة...يعني انتو لازم تطلعوا ميتينا يعني  بهذيكم ده

بس احنا مش هينفع اننا نكمل الفترة الانتقالية بالطريقة دي مش كل شوية يعملولنا خبر في بالونة ويفرقعوه نقوم نبص ونتضايق فيقوموا قايلين مش انا اللي فرقعتها..فبقينا ماشيين بالسياسة التالية:
1- فرقع الخبر
2- شوف رد فعل الناس
3- اعترضوا...طلع <بيان لا صحة> (حاجة زي استمارة 6جند كده بتطلع من المجلس العسكري عشان ينفي الاخبار الكدابة اللي هو اساسا بينشرها)
4- سكتوا...نفذ الخبر

بقوا كل شوية ينفخوا بالونة والاعلام يفرقعها..وبقت دولتنا قايمة على تلات ركائز اساسية:
1- بالونة: هي الاشاعات اللي المجلس بيسربها
2- المجلس السمكري: هو اللي بينفخ البالونة-هو اللي بينشر الخبر-
3- الاعلام العاهر: وطبعا ده اللي بيفرقع البالونة

فبصراحة اذا كان المجلس السمكري بيعامل الشعب المصري على انو فأر تجارب..فالنظام ده مش هينفع معانا يا تشتغل بالمعروف يا تمشي بالمعروف..لأن المصريين عمرهم مهيقبلوا انهم يبقوا فيران تجارب وعمرهم مهيقبلوا انهم يبقوا مهمشين تاني..خلص الكلام ونازلين 20 مايو و27 مايو

وأحب اختم التدوينة دي بكلمة للكاتب جلال عامر:

"بعد كل قيصر يموت..يولد قيصر جديد...فلا تخدعك الأسماء وتصدق أن <فرس النبي> مؤمن، وأن <عباد الشمس> كافر!!!"

اشوفكو التدوينة الجاية...

مش عارف

بصراحة أنا مش عارف أتكلم في ايه...حسيت ان انا بعد ما عملت المدونة دي عملتها في وقت غلط الدنيا بايظة: فتنة طائفية،جيش متباطئ،اعلام منافق،انهيار اقتصادي،واللي زاد بقى وغطى قلك ايه حسني حيعتذر للشعب...هيهئ...ايه..يا نهار اسود وكمان سوزي وزيكو طلعو من الكسب غير المشروع...ماهي ناقصة اصلها بروح امكو..مش فاضل غير انهم يقولوا ان حسني راجع يحكم أخر الشهر

لذلك لقد قررت(زي الموكوس-المخلوع-) ان اخصص اول تدوينة للتعريف بالمدونة الغريبة دي..والمدون الغريب ده
أيها الأخوة والأخوات -مش عارف ليه شكلي حقلب على مبارك كمان شوية- المهم نتعرف بقى
الاسم: ايهاب زعقوق
المهنة: طالب هندسة مطحون
التوجهات السياسية: واضحة من العنوان -ليبرالي ومتعفن كمان
ليه؟؟؟
ليه المدونة؟ لأن انا متهيألي ان الليبرالية هي الحل...هاهاهاها ايوه سمعت الشتيمة اللي اتقالتلي دلوقتي..هو احنا كده الليبراليين نتشتم ونضحك

ليه انا؟ مش عارف بس ليه مش انا..ما يمكن انا كمان ابقى مدون مشهور زي الخلق الكتيرة دي وتلاقيني في التليفزيون ومكتوب عالشاشة المدون ايهاب زعقوق...حقه دي لو حصلت اول مبقى رئيس جمهورية حعملها مهنة في البطاقة

ليه تعفني؟ بصراحة انا ليا يمكن نظرة مختلفة لليبرالية شوية عن ما الناس فهماها او على الاقل لسه مقبلتش حد شفها زي ما انا شايفها احيانا بحس ان انا مش ليبرالي ولكن من المثاليين-اكيد مش مثالي كصفة- ولكن باحث عن المثالية زي المثاليين بتوع الفلسفة كده بس لما باقعد افكر مع نفسي بلاقي اصلا ان المثالية في الاساس مش مثالية خالص لانها اساسا مش موجودة في الكون اللي احنا فيه عشان كده انا فضلت اني اكون متعفن موجود عن اني اكون مثالي مش موجود...آه وبالمناسبة اللي طلع الاسم ده عليا واحد صاحبي من الشباب الناصري

ليه انا والمدونة؟ انا بصراحة يمكن تكون عندي افكار لحلول مشاكل من اللي عندنا في مصر ونفسي بجد انشرها واكتبها في مُكنة اهو على الاقل احس اني بتكلم مع حد ويمكن..مجرد يمكن..افكاري توصل لحد ولو موصلتش انا مصمم اني احققها لما ابقى رئيس جمهورية
خلاص مش هطول عليكو المره دي..المهم ان احنا اتعرفنا..اشوفكو التدوينة اللي جاية